ජාතික QR ගෙවීම් ප්රචලිත කිරීමේ ව්යාපෘතිය දියත් කිරීම අද
April 6, 2026 07:35 am
මෙරට ඩිජිටල් ආර්ථිකයේ නව සන්ධිස්ථානයක් සනිටුහන් කරමින් “ජාතික QR ගෙවීම් ප්රචලිත කිරීමේ ව්යාපෘතිය"ජනාධිපති අනුර කුමාර දිසානායක මහතාගේ ප්රධානත්වයෙන් අද (06) පෙරවරුවේ නිල වශයෙන් දියත් කිරීමට නියමිතය.
ඒ අනුව මෙහි සමාරම්භක අවස්ථාව ජනාධිපතිවරයාගේ ප්රධානත්වයෙන් අද උදෑසන 09.30ට ජනාධිපති ලේකම් කාර්යාලයේදී ආරම්භ වීමට නියමිතය.
ශ්රී ලංකාව කාසි සහ නෝට්ටු භාවිතය අවම වූ ආර්ථිකයක් කරා මෙහෙයවීම මෙහි මූලික අරමුණ වන අතර ඒ අනුව අද සිට ක්රියාත්මක වන පරිදි, රුපියල් 5,000 දක්වා වූ සියලුම LankaQR ගනුදෙනු සඳහා වෙළෙඳුන්ගෙන් අය කරනු ලබන සේවා ගාස්තුව සම්පූර්ණයෙන්ම ඉවත් කිරීමට මූල්ය ආයතන කටයුතු කර ඇත.
මෙහි අරමුණ වන්නේ කුඩා පරිමාණ වෙළෙඳුන්ට කිසිදු අමතර වියදමකින් තොරව ඩිජිටල් ගෙවීම් භාර ගැනීමට අවස්ථාව ලබා දීමය.
මේ වන විට ශ්රී ලංකාව තුළ ඉතා ශක්තිමත් ඩිජිටල් මූල්ය යටිතල පහසුකමක් පවතින අතර, මෙරට වැඩිහිටි ජනගහනයෙන් 89%කට බැංකු පහසුකම් පවතී. එමෙන්ම එක් කාර්තුවක් තුළ රුපියල් ට්රිලියන 6.3ක වටිනාකමකින් යුත් ගනුදෙනු මිලියන 68ක් සිදු කරන CEFTS පද්ධතිය මෙන්ම, මූල්ය ආයතන 20කට අධික සංඛ්යාවක සහයෝගය ඇතිව වෙළෙඳ මධ්යස්ථාන 450,000ක පිළිගැනීමට ලක්ව ඇති LankaQR පද්ධතියද අද වන විට සක්රීයව පවතී.
කෙසේ වෙතත්, තවමත් ආර්ථිකය තුළ රුපියල් ට්රිලියන 1.48ක මුදල් නෝට්ටු සංසරණය වන අතර, 2025 තුන්වන කාර්තුව වන විට LankaQR මඟින් සිදු වූයේ මසකට රුපියල් 395,000ක පමණ වූ ඉතා සුළු ගනුදෙනු ප්රමාණයකි. මෙම පරතරය අවම කිරීම සඳහා අද ඇරඹෙන ව්යාපෘතිය යටතේ විශේෂ උපායමාර්ග කිහිපයක් ක්රියාත්මක වේ.
එමෙන්ම, QR භාවිතය දිරිමත් කිරීම සඳහා පාරිභෝගිකයන් සහ වෙළෙඳුන් වෙනුවෙන් විශේෂ දිනුම් ඇදීමේ වැඩසටහනක්ද ක්රියාත්මක වන අතර, එහිදී සතිපතා සහ මාසිකව පළමු, දෙවන සහ තෙවන ජයග්රාහකයින් සඳහා රුපියල් 1,000,000 දක්වා වූ වටිනා ත්යාග දිනා ගැනීමට අවස්ථාව හිමි වේ.
මෙම වැඩසටහනේ සාර්ථකත්වය උදෙසා සිංහල, දෙමළ සහ ඉංග්රීසි භාෂා ත්රිත්වයෙන්ම ජාතික මට්ටමේ ප්රචාරණ ව්යාපාරයක්ද අද සිට ආරම්භ කෙරෙන අතර දිස්ත්රික්ක 25ම ආවරණය වන පරිදි සැකසූ "සමාජ දෘශ්යතා දර්ශකය" මඟින් මෙම වැඩසටහනේ විනිවිදභාවය සහ සාධාරණත්වය සහතික කර ඇත.
